Fallegt land

Einu sinni fannst mér ekkert landslag fallegt nema það væru tré í því. Ég er alveg búin að jafna mig á því. Nú finnast mér lyngi vaxnar heiðar og stórbrotið landslag hálendisins jafnvel enn fallegra. Síðustu tvær helgar höfum við karlinn minn farið í prufuútilegur í nýja pallhýsinu. Alger dýrð. Hvílík forréttindi að geta komið sér fyrir einhvers staðar úti í móa langt frá öllu og öllum og geta horft úr rúmstæðinu á náttúruna allt í kring. Hér eru myndir af íslenskri dýrð:

Þessi er tekin á leiðinni um Kaldadal við Geitá. Ekki beinlínis gróðursælt en geysilega fallegt!

Þarf að fara þarna aftur einhvern tíma fljótlega og gefa mér betri tíma til að skoða mig um. 

 

 

Þessi er hins vegar tekin rétt hjá Hítarvatni rétt undir miðnættið. Mun meiri gróður þar, allt á kafi í mosa yfir úfnu hrauninu og víða í nágrenninu kjarr og huggulegheit. Hvort tveggja ómótstæðilegt.

 

Bráðlega ætlum við að fara af stað og skoða landið í viku, 10 daga. Get ekki beðið!

Athugasemdir

[Sigurlaug B. Gröndal, 27.7.2007 kl. 13:08]

Takk fyrir kveðjuna. Við erum að leggja í hann.  Hafðu það gott sömuleiðis. Íslensk náttúra er nefninlega alveg einstök og einmitt næturbirtan er svo falleg. Hafðu rosalega gott Björg mín í ferðinni og njótið fegurðarinnar og kraftsins sem íslenska náttúran gefur okkur. Góða ferð. 

[Erla Ösp (IP-tala skráð) 29.7.2007 kl. 13:11]

Virkilega fallegar myndir!   það er alveg satt hjá þér, fegurð Íslands leynist á mörgum öðrum stöðum en í gróðurlendi.