Náungakærleikur?

Allt sem þér viljið að aðrir menn gjöri yður, skuluð þér  og þeim gjöra.

 

Ég er ekki mikil trúmanneskja en ég trúi þessu alveg staðfastlega. Ég veit að það er trúfrelsi og að fólk hefur mismunandi gildi og sannfæringu. En ég vildi óska að það væru fleiri sem hefðu þessa reglu í heiðri.

 

Það sem veldur þessum pælingum mínum núna er umræðan um útlendinga. Það er mikið rætt um að það eigi ekki að hleypa “þessu fólki” inn í landið eða að það eigi að gera hitt eða þetta við “þetta fólk” og að “þetta fólk” sé svona eða hinsegin og yfirleitt er þetta allt  á mjög neikvæðum nótum. Eftir þessum umræðum að dæma eru þetta allt nauðgarar, þjófar og eiturlyfjasmyglarar.

 

Hvernig væri að láta duga að taka á þeim einstaklingum sem gerast brotlegir og sýna hinum þá virðingu sem þeir eiga skilið? Ég er alveg handviss um að það er ekki auðvelt að taka sig upp frá fjölskyldu og vinum, flytjast til ókunns lands þar sem þú skilur engann og enginn skilur þig og vinna þar fyrir launum sem þú sendir að stærstum hluta heim til að reyna að tryggja fjölskyldu þinni framfærslu. Ég hef líka heyrt marga hrósa þeim fyrir vinnusemi og dugnað. Þeir mæta í vinnuna og eru ekki heima "veikir". Það eru nokkur atriði sem mér finnst vert að hafa í huga þegar sleggjudómar fljúga:

 

-           Íslendingar báðu fólkið um að koma hingað.

-           Íslendingar bera ábyrgð á launakjörum fólksins. Heldur einhver í alvöru að þeir vilji ekki hærra kaup?

-           Íslendingar bjóða þeim lélegar vistarverur. Höldum við að þeir vilji ekki rúmbetra og notalegra húsnæði með tryggum brunavörnum?

-           Íslendingar sjá almennt um að erlendir verkamenn tali ekki íslensku. Íslendingar tala yfirleitt ensku við erlent fólk. Sem er undarlegt þ.e. pólverjar t.d. tala almennt ekki ensku. En þeir eru nokkuð fljótir að læra hana á Íslandi.

 

Um daginn fór ég á sunnudegi með karlinum mínum í Smáralindina. Þar rákumst við á pólverja sem við erum málkunnug. Duglegur og hress karl sem mætir undantekningalaust í sína vinnu og vinnur vel fyrir sinn vinnuveitanda. Hann sagði okkur að hann væri í smá basli þessa dagana af því að hraðbankinn át debetkortið hans nokkrum dögum áður. Hann hafði gleymt að sækja nýtt kort þegar kortið rann út mánaðamótin á undan. Kemur fyrir besta fólk. Svo sagði karlinn: “En þetta gerir ekkert til. Ég er nefnilega pólverji og ég fer hvort eð er bara í Smáralindina til að stela. Ætli ég hendi ekki bara úlpunni minni og steli mér nýrri!” Svo hló hann að gríninu. Ég brosti eins og fífl en fékk um leið hnút í magann. Einhverjir elskulegir íslendingar hafa verið svo almennilegir að gera honum og hans félögum það fyllilega ljóst hverslags pakk hann og hans hyski sé. Hverslags hegðun er þetta eiginlega? Á fólk ekki að skammast sín?

 

Einu sinni hreyktum við okkur yfir að vera gestrisin þjóð. Ég held að því fari verulega fjarri þessa dagana.

Þetta að haga sér við fólk eins og við viljum að sé komið fram við okkur er líka eitthvað sem virðist hafa

gleymst. Við það er ég ósátt og ég skammast mín oft fyrir landa mína þessar vikurnar.

Athugasemdir

[Margrét Össurardóttir (IP-tala skráð) 17.11.2007 kl. 16:36]

Fjandi mikið til í þessu hjá þér Björg mín,,,,, hvenær býður þú þig fram á þing?

[Sigurlaug B. Gröndal, 18.11.2007 kl. 17:42]

Já, þetta er ótrúleg framkoma. Við erum því miður uppfull af hroka og mikilmennskubrjálæði en með bullandi minnirmáttarkennd inn við beinið. Við teljum okkur ekki vera rasista en hvað hefur komið á daginn og hvað mun koma á daginn þegar og ef hér verður minnkandi atvinna og fólk þarf að keppast um að fá vinnu? Hvernig yrði staðan þá? Við erum svo fljót að benda á flísina í auga náungans en sjáum ekki bjálkann í okkar eigin! Svo mikið er víst. Við erum öll manneskjur hvaðan sem við komum. Við eigum rétt á sömu virðingingu, hvaðan sem við komum. Það er tími til kominn að þessi þjóð þroskist!

[Bylgja (IP-tala skráð) 20.11.2007 kl. 11:05]

Íslendingar eru margir hverjir fordómafullir en klæða fordóma sína í búning umhyggju og þá um leið hroka. Okkur Íslendingum finnst sjálfsagt að dröslast með okkar illa lyktandi mat eins og harðfisk, hákarl og hangikjöt til útlanda og finnst við bara flott að ganga fram af fólki með lyktinni. Eins er mikil lotning borin fyrir Vestur Íslendingum sem hafa haldi í siði gamla landsins og voru ekki mjög fljótir að aðlagast á sínum tíma. Við fyllumst stolti þegar við hittum Íslending frá Gimli sem talar íslensku eins og til dæmis frændur mínir gera sem þó eru fæddir í Ameríku.

[Erla Ösp (IP-tala skráð) 22.11.2007 kl. 15:40]

Þetta er ofboðslega erfitt mál að eiga við.....  Ég tel mig ekki fordómafulla en vil þó takmarka flæði erlendra aðila inn í landið. sér í lagi vegna þess að þeim er ekki nægilega boðið upp á íslensku kennslu og vegna þess hve sumir eiga erfitt með að aðlagast íslensku samfélagi.  Mér finnst að þeir sem hér búa eigi að leggja sig fram um að læra málið.
Og þegar td. íslendingar eru að lenda í vandamálum með strætókerfi RVK(sem er nú ekki auðvelt fyrir) en geta ekki treyst á að bílstjórarnir geti aðstoðað þau með val á leiðum... og þegar hringt er inn pöntun (td. til fyrirtækis sem ég vinn hjá) frá íslensku fyrirtæki en samtalið fer fram á ensku.... jaaa þá finnst mér eitthvað þurfa að gera.

Undanfarið hafa verið leiðinlegar fréttir varðandi ofbeldi hjá Pólverjum, og deila má um hvort rétt sé að nefna þjóðerni í fréttaflutningi, dæmi hver fyrir sig.

En já, framkoma við erlent fólk er íslendingum oft til skammar því miður!

[Einar Bragi Bragason., 23.11.2007 kl. 00:25]

Gott hjá þér stelpa