Breyttar umferðarreglur....

Umferðarreglurnar virðast hafa breyst töluvert síðan ég tók bílpróf fyrst. Svo tók ég reyndar meiraprófið fyrir rúmu ári síðan og komst þá að því að reglurnar í bókunum eru alveg eins og mig minnti, en samt hafa þær í rauninni breyst töluvert. Sérstaklega um hvað ljósin á gatnamótum þýða. Þið vitið; Þessi gulu, rauðu og grænu?

 

Einu sinni voru reglurnar þannig að rautt þýddi stopp, gult varúð og þá átti maður annað hvort að undirbúa sig fyrir að taka af stað eða stoppa, og svo þýddi grænt ljós að maður mátti aka af stað. Þegar þessar reglur giltu þá gat maður, ef maður var þannig innstilltur, setið í bíl fremst á ljósum og skoðað mannlífið í kringum sig án þess að einblína á ljósin. Svo þegar bílarnir sem voru að aka þvert á mann stoppuðu, þá var mátulegt að setja í gír og taka af stað. Þá nefnilega stoppuðu bílar þegar það kom gult og svo rautt ljós.

 

Núna er s.s. búið að breyta. Ef maður horfir ekki stíft á götuvitann og tekur ekki ofurvarlega af stað þegar það er komið grænt hjá manni, þá stoppar hin umferðin alls ekki, sama hvað staða umferðarljósanna segir!

 

Ég ýki ekki einu sinni smávegis þegar ég segi að það gerirst ekki stöku sinnum, heldur oft á hverjum einasta degi að þegar það er komið grænt hjá mér eru bílar enn að aka á fullri ferð þvert á mína akstursstefnu. Og það eru ekki einhverjir sem eru búnir að sitja fastir á gatnamótunum og eru að hreinsa þau – þetta eru bílar sem leggja af stað yfir gatnamótin eftir, eða í þann mund, að það er komið grænt á hina akstursstefnuna.

 

Sum gatnamót eru verri en önnur í þessu eins og t.d. gatnamótin við Álftanesveg í Engidal, en þetta á sér stað á öllum gatnamótum í bænum. Ég skil hreinlega ekki af hverju það verða ekki oftar slys og það slæm en raunin er. 

 

Mér finnst alla vega glatað að breyta reglunum svona og finnst að það eigi að breyta aftur til baka.

Athugasemdir

[Margrét Össurardóttir (IP-tala skráð) 19.1.2008 kl. 11:04]

Hver breytti og lét mig ekki vita ?????

[ingunn Björns (IP-tala skráð) 19.1.2008 kl. 12:19]

Það er varla óhætt að vera þarna úti í umferðinni, því auðvitað metur maður sjálfan sig sem góðan bílstjóra, en það eru allir hinir bjánarnir sem eru stórhættulegir!!! Ég er svo innilega sammála þér varðandi rauðu, gulu og grænu ljósin í umferðinni. Ég fer yfir svo að segja "hættulegustu gatnamót" á höfuðborgarsvæðinu á hverjum degi (Kringlumýrabraut/Miklabraut) og ég fæ bara hland fyrir hjartað þegar ég er á þessum slóðum því það eru teknir svooooo margir sénsar gagnvart ljósunum að í rauninni veit ég aldrei hvenær er óhætt að aka af stað á grænu..... það gæti hugsanlega komið þorskhaus sem kann ekki reglurnar og keyrt í veg fyrir umferðina sem er að leggja af stað yfir gatnamótin!!! Algjörlega fáránlegt!! En svona er umferðin í dag.

[Sigurlaug B. Gröndal, 19.1.2008 kl. 16:17]

Já, þetta er alveg rétt. Það er alveg ótrúlegir sénsar sem teknir eru á stórvarasömum gatnamótum sem og öðrum. Annað sem ekki virðist vera á hreinu eða breytt, það er hvernig haga skal akstri á hringtorgi. Þegar ég lærði á bíl þá gilti sú regla að þeir sem væru að fara framhjá einum eða fleirum gatnamótum ættu að vera í innri hring, innri hringur hefur réttinn. Þeir sem væru að fara út úr hringnum á næstu gatnamótum ættu að velja ytri hring sem ekki hefur réttinn. Einnig var óheimilt að skipta um akrein í hringnum. Nú ber hins vegar við að menn velja ytri hring og fara kannski framhjá 2 gatnamótum og svína fyrir hina eða að menn velja innri hring, svína yfir á hægri akrein um leið og þeir beygja út úr hringnum. Hver skyldi hafa breytt þessum reglum?