Sunnudagsbíltúr...... (varúð - langur pistill!)

Við hjónin fórum áðan í sunnudagsbíltúr. Tókum góðan rúnt um Reykjanesið. Við ókum héðan úr Vogunum, gegnum Keflavík og út í Garð.  

Garður er mikið stærri en ég bjóst við og heilmikil uppbygging þar í gangi. Fullt af nýjum íbúðarhúsum á lóðum sem myndu gera húsbyggjendur á höfuðborgarsvæðinu græna af öfund. Engin hætta á að nágranninn sé neitt ofaní manni þarna! Svo ókum við út að Garðskagavita. Þar er búið að útbúa veitingastað, Flösina, í iðnaðarhúsnæði sem þar er. Flösin er með stóra og fína verönd sem snýr að sjónum og er örugglega frábært að sitja þarna og fá sér eitthvað gott í gogginn þegar veður er gott. Núna vorum við ekki í stuði fyrir veitingahúsastopp svo við héldum áfram og ókum stystu leið til Sandgerðis.

 

Þar rúntuðum við aðeins um bæjinn en héldum svo áfram Stafnesveg í átt til Hafna. Satt að segja er ekki mikið að sjá í Sandgerði. Alla vega sá ég það ekki. Ég held ég hafi aldrei ekið þessa leið áður. Heilmikið að sjá. Lítil skrýtin kirkja í Hvalnesi sem ég hefði viljað taka mynd af en….. myndavélin gleymdist heima. Svo fórum við framhjá Stafnesvita. Þar virðist vera þónokkur byggð. Hvað fólk dundar sér við þar hef ég ekki hugmynd um.

 

Vegurinn frá Sandgerði yfir í Hafnir er ágætur. Búið að gera hann fullorðins alla leið. Reyndar er þetta malarvegur mestanpartinn. Svo kemur, eins og víða í íslensku vegakerfi, allt í einu þessi fíni vegarkafli með tvíbreiðu malbiki. Það er ekkert við þennan kafla og hann nær ekki frá neinum stað eða að neinum stað. Þetta er bara malbiksbútur “in the middle of nowhere”!

 

Hafnir eru áreiðanlega með minni bæjum á landinu. Ekki mörg hús þar. Þar stoppuðum við samt niðri við pínulitla bryggu og horfðum á brimið. Hvílík læti í sjónum. Hann ólmaðist og kraumaði hvítfyssandi þarna fyrir utan og langt útí sjó! Endalaust hægt að horfa á brim. Svona á svipaðan hátt og maður horfir á eld. Síbreytilegt og dáleiðandi.

 

Frá Höfnum ókum við áleiðis til Grindavíkur. Beygðum útaf þar sem skilti sagði Reykjanesviti. Þar ókum við framhjá nýju Reykjanesvirkjuninni. Þeir hafa greinilega vandað sig við að hrófla sem allra minnst við hrauninu í kring. Þannig standa húsin og leiðslurnar inni í miðju hrauni með hraunið rétt við húshliðina. Það er ekki búið að klára allt en virðist verða mjög snyrtilegt og fínt hjá þeim. Ekki meiri lýti að þessu í landslaginu en skreiðarhjöllunum sem rétt lafa uppi þarna í nágrenninu.

 

Svo héldum við áfram í áttina að vitanum. Bóndi minn þurfti reyndar aðeins að prófa einn slóða sem liggur þarna – athuga hvert hann liggur. Þar var deginum algerlega reddað fyrir honum þegar bíllinn sat fastur í skafli. Það tók smá mokstur og hjakk en tókst að losna án mikilla tilfæringa. Renndum svo út að vita og snerum þar við og héldum aftur áleiðis til Grindavíkur. Þegar við vorum rétt að koma til Grindavíkur sáum við stórt fiskiskip sigla út úr höfninni. Skipið steypti stömpum þegar það keyrði í gegnum ölduna útúr höfninni. Ég hefði sko ekki viljað vera um borð! Nóg af brimi í Grindavík eins og í Höfnum en það hegðar sér allt öðruvísi þar. Í Grindavík ólmast það ekki nærri eins, en þegar það kemur þá verða skvetturnar miklu stærri og þeytast hátt í loft upp. Þar sem við þekkjum okkur allvel í Grindavík slepptum við öllum rúnti þar um og héldum heim.

 

Það er greinilega búið að laga vegina heilmikið á þessari leið. Sumsstaðar voru skaflar á veginum en bíllinn er þannig búinn að það var ekkert stórmál. Svo er líka svo mikil umferð alls staðar að það hefðu hvergi liðið nema örfáar mínútur þangað til einhver hefði verið kominn á staðinn. Þar sem vegirnir liggja nálægt sjónum bera þeir greinileg merki um óveðrin undanfarið. Grjót, möl og þang liggja um alla vegi og bryggjur. Jafnvel rekaviður!

 

Ég er alltaf að sjá það betur og betur að Reykjanesið leynir á sér. Hér er alveg fullt að skoða og ég ætla að taka svona bíltúr aftur í sumar. Helst nokkra. Sá nefnilega fullt af vegarslóðum sem vert er að kanna við tækifæri. Ætla þá að muna eftir myndavélinni.

Athugasemdir

[Sigurlaug B. Gröndal, 10.2.2008 kl. 21:56]

Þetta hefur verið æðislegur rúntur sem þið tókuð. Það er sko víst að Reykjanesið leynir á sér. Ég ók t.d. tvívegis með suðurströndinni til Þorlákshafnar sumarið 2006 og fjölbreytileiki landslagsins og fegurð eru alveg stórkostlegur. Ýmist er maður staddur í algerri hrauneyðimörk og svo er komið í gróðurvin með kjarri upp í miðjar hlíðar (þegar nær dregur að Selvoginum) og svo allt þar á milli. Það er endalaust hægt að skoða Reykjanesið. Það er eins með Snæfellsnesið. Endalaust hægt að skoða eitthvað nýtt. Æðislegt hjá ykkur að drífa ykkur á þennan rúnt!

[Erla Ösp (IP-tala skráð) 11.2.2008 kl. 21:11]

þetta er eitt af því sem maður ætlaði sér alltaf að gera öll þessi 9 ár sem ég bjó fyrir sunnan!  Alveg eins og allt sem maður ætlar að skoða hérna í nágrenningu en kemur aldrei í verk.

 Sem verður til þess að ég fer aðeins að spá í tímann, þetta fyrirbæri sem allir tala um af mismikilli hrifningu. Og í flestum tilfellum finnst fólki eins og hann sé að svíkja okkur á einn eða annan hátt.  Annað hvort hleypur hann í burtu sem gerir það að verkum að maður kemst ekki nema brota brot af því sem planað var - eða að tíminn skríður áfram mínutu fyrir mínutu...... 
En hvernig fáum við tímann til að vinna okkur í hag????  ætli maður verði bara að sætta sig við hann og þá sé málið leyst?

[Einar Bragi Bragason., 12.2.2008 kl. 15:55]

Hey fór til Keflavíkur til Rúnars Júll á Sunnudaginn og skoðaði aðeins þinn bæ í leiðinni .......krimmabælið he he ........en það vaxa engin tré þarna............það vaxa tré í Garðabæ........fattarðu he he ........gott veður í Vogum uss uss

[Björg Árnadóttir, 12.2.2008 kl. 20:53]

Víst er fullt af trjám! Þeir sem hafa nennt að planta eru með fína garða - það er sko víst gott veður í Vogunum!!!

[Einar Bragi Bragason., 13.2.2008 kl. 00:05]

þetta eru ekki tre .......þetta eru hríslur góða