Björg Árnadóttir

6.5.2008 | 14:59

Góðan dag og gleðilegt sumar!

Jæja, það er morgunljóst að ég hef verið afspyrnu blogglöt undanfarið. Hef samt kíkt á aðra bloggara öðru hvoru en lítið kommentað. Ástæðan fyrir letinni er eiginlega tvöföld: Ég hef samið þessa afspyrnu fínu pistla í kollinum á mér yfir daginn og legið mikið á hjarta en einhvern vegin hefur mér verið algerlega fyrirmunað að rifja upp spekina þegar heim er komið að kveldi. Svo hef ég líka verið að gera garð við húsið mitt – Loksins!

Ferningurinn sem hefur umkringt húsið mitt frá því það var byggt 1978 hefur tæpast getað kallast garður. Þetta hefur verið risastór ferningur umlukinn steinvegg og ræktunin einskorðuð við grasstrá og mosa. Spurning hvor grænmetistegundin hefur haft vinninginn.

Við byrjuðum í fyrra að moka öllu sem í garðinum var í burtu og setja nýtt efni í hann. Aðallega grús svo hægt væri að keyra um hann á vinnuvél. Þá fór heitavatnsheimæðin í sundur. Mjög gaman. Svo urðum við stopp, aðallega vegna tímaskorts. Nú hættu bankarnir að lána húsbyggjendum svo við höfum haft smá tíma undanfarið og garðurinn er óðara að taka á sig svip. Búin að gera volduga steinhleðslu og laga það sem laga á fyrir aftan húsið, búin að gróðursetja limgerði við austurhliðina og langt komin með að jafna undir grasblettinn sem á að vera þar. Ég er ekki viss um að nágrannarnir sjái hvað þetta er að verða fínt en ég geri það og er alsæl! Pallurinn sem koma á framan við húsið verður hins vegar settur á salt. Vonandi fæðist hann næsta vor.

Hér er smá sýnishorn af garðinum. Þetta er nú svosem ekki merkilegt svona á myndinni, grá möl við gráa hleðslu og tekið í grárri rigningu. Plönturnar nærri ósýnilegar vegna smæðar greyin! En þetta hlýtur að koma með árunum. Verð líklega að æfa mig í þolinmæði...... sem hefur ekki verið mín sterkasta hlið!!

Flokkur: Bloggar | Facebook

Athugasemdir

þetta verður flott......eru þetta ekki samt hæstu tréin í hverfinu

Einar Bragi Bragason., 6.5.2008 kl. 15:02

Mjög flott og þið dugleg

Eru þetta ekki hæstu trén á Suðurnesjum?

Bylgja (IP-tala skráð) 7.5.2008 kl. 09:13

Dísúss hvað þið eruð eitthvað almennileg!! Þið verðið bara að skella ykkur í sunnudagsbíltúr og koma og skoða skógana í Vogunum!! Einar verður reyndar að taka sér sumarfrí og viku ferðalag af sínum útnára en trjáræktin í Vogunum er alveg þess virði.... eða sko.... jammm.....