Náttúran og við

Það er ýmislegt á seyði tengt náttúrunni. Nýlega voru haldnir tónleikar undir yfirskrift náttúrunnar. Fjöldi fólks mætti í blíðri veðurnáttúru í fallegri Laugardalsnáttúru og hlustaði á nokkra stærstu poppara þjóðarinnar. Minni sögum fer af hversu vel gekk að koma boðskapnum á framfæri. Ekkert hef ég frétt af hversu vel gekk að safna frjálsum framlögum til kynningar náttúrunni. Hins vegar hef ég frétt að borgarstarfsmenn hafi haft í nógu að snúast við að þrífa hina fögru náttúru. Hvað segir það um náttúrulegar þenkingar tónleikagesta?

Annað náttúruvænt sem líka hefur verið í fréttum varðar Kerið í Grímsnesi. Þar hafa eigendur lokað á heimsóknir langferðabifreiða til að minnka ágang og náttúruskemmdir. Þeir sem hafa haft aur fyrir að aka með túrista þangað eru eitthvað sárir og svekktir. Sumir fá hland fyrir hjartað þegar rætt er um að takmarka aðgengi eða rukka aðgangseyri að náttúruperlum. Þetta sama fólk fer til útlanda og borgar þegjandi og hljóðalaust fyrir að ganga í löngum halarófum um hella og hvað annað sem fyrir augu ber. Því mega íslendingar ekki rukka fyrir aðgang að náttúruperlum eins og aðrar þjóðir? Þetta með Kerið og reyndar marga fleiri staði á landinu er algert skólabókadæmi um hvað gríðarlegur ágangur túrista er langt kominn með að skemma það sem fagurt er og sérstakt.  Hvers vegna ekki að takmarka aðgengi, geta þannig notið náttúrunnar eilítið lengur, rukka einhvern aðgangseyri þar sem það á við og nota féð til viðhalds og uppbyggingar á stöðunum? Ég sá t.d. að einhver leiðsögumaður var æfur yfir að klósettin voru ekki í toppstandi við Dettifoss að mig minnir. Vesalings, aumingja fólkið þurfti að pissa úti!!!!  Hvað skyldi þessi leiðsögumaður vera tilbúinn að rukka sína hópa fyrir að fá alla þjónustu þar sem þeim dettur í hug að stoppa? Heldur fólk að það sé ókeypis að koma allri þessari „sjálfsögðu“ aðstöðu fyrir og viðhalda henni? Nei, ég held að ef við viljum á annað borð hafa ferðamannaiðnað á Íslandi þá verðum við bara að kyngja því að gera eins og aðrar þjóðir og rukka fyrir þjónustuna og aðgengi að sýningunum (lesist: náttúrunni).

Svo er náttúran líka á fullri ferð hér heima. Hanna mín er alveg á steypinum. Hún var sett á 2. júlí en enn er lítið að gerast. Það er búið að ýta við belgnum en ef ekkert skemmtilegt gerist núna um helgina ætla þeir að skoða hana eitthvað betur eftir helgi. Þeir vilja líklega ekki að hún bíði mikið lengur þ.e. þeir telja að barnið sé orðið í stærra lagi. Faðir barnsins mælist 2,06 mtr. á hæð svo það er nú líklega ekkert ólíkllegt að krílið taki smá pláss.  Siggi hefur frá fyrsta degi sagt að barnið komi í heiminn í dag, 5. júlí. Það yrði mjög gaman en hann yrði kannski full montinn með að fá svo flotta afmælisgjöf!

Athugasemdir

[Kristin (IP-tala skráð) 5.7.2008 kl. 19:35]

Ég sagði þetta líka í gestabókinni hjá Hönnu um daginn, úr því barnið kom ekki á settum degi þá segjum við að það komi í dag,  það eru nokkrir tímar til stefnu enn, nema að eitthvað hafi gerst og það sé komið þegar þetta er skrifað.

Bestu kveðjur og vona að Siggi hafi átt ánægjulegan dag,

Kristín

[Guðmundur Guðmundsson, 6.7.2008 kl. 19:46]

Já, klósettmenningin er víða skemmtileg.  Í fyrrasumar fór ég Fjallabaksleið nyrðri á leiðinni norður Sprengisand.  Ég, þe. við, fórum í Eldgjá og skoðuðum Ófærufoss.  Skammt frá bílastæðinu er skúr með klósettum, tveimur að mig minnir.  Það er skemmst frá að segja að aðkoman var sérlega glæsileg, eða þannig..ehemm.  Ég skoðaði aðstöðuna, lönguhandónýtan vatnshrút í kassaræksni (nánast horfnu) og langaði eiginlega ekki að skoða inn í skúrinn, en svona rétt kíkti, jú, ástandið inni var alveg í takt við vatnsleysi vegna lönguhandónýta hrútsins.

Borga 100kr. á kjaft, (svona 4000 pr. rútu) sem myndi duga til að halda þessu við svo það sé ekki landi og þjóð til skammar.

[Björg Árnadóttir, 7.7.2008 kl. 00:00]

Nákvæmlega! Þarf engar ofur upphæðir.

[Margrét Össurardóttir (IP-tala skráð) 10.7.2008 kl. 00:01]

Líkt og venjulega þá er ég sammála þér krútta, ég hef farið um næstum alla Evrópu sem bakpokalingur og klósettin sem boðið er upp á í flestum löndum var ok, en einstaka dollur voru ógeðslegar. Í raun hef ég séð fleiri ógeðslegar dollur hér á landi en í allri henni Evrópu.