Þá er hún farin

Loksins er hún farin frá.

Svo einkennilega vill til að aldrei þessu vant er ég sammála Ingibjörgu Sólrúnu. Ég hefði verið sátt við Jóhönnu í forsvari fyrir stjórn fram að kosningum. Ekki af því ég sé sammála hennar hugsjónum eða stefnumálum, heldur vegna þess að ég held að það efist enginn um heilindi hennar. Hún er trú sínum hugsjónum, er forkur til vinnu og ég held hún líði ekki spillingu og aumingjagang hjá sínu fólki. Hún væri því fín í endurskoðun og tiltekt ásamt því að keyra málin áfram næstu vikur.

Að auki er hún einn fárra stjórnmálamanna sem hefur alla tíð frekar hugsað um fjölskyldurnar en fyrirtækin.

Stjórnarsamstarfi lokið

Hvað er að??

Ég skil að fólk mótmæli. Ég skil líka að það geti skorist í odda milli lögreglu og mótmælenda þar sem stundum stangast á verkefni þeirra. En að snúa aðgerðum sínum beinlínis að lögreglunni og það einstökum lögreglumönnum er algerlega óskiljanlegt og ófyrirgefanlegt!

Svo er fólk hissa á að það gangi stundum erfiðlega að manna lögregluna með hæfu fólki??

Nafnbirtingin grafalvarlegt mál

Til sölu....

... stórgott hús á besta stað í Vogum á Vatnsleysuströnd. Við húsið er splunkunýr garður hannaður og unninn af algerlega próflausum landslagsarkitekt (mér!). Einnig fylgja teikningar af verönd og plani framan við húsið sem eru unnar af fínasta landslagsarkitekti með próf!

Húsinu fylgja fyrirtaks nágrannar, rólegt og gott umhverfi á veðursælasta stað sem ég hef búið á (Garðabær meðtalinn ).

Hér er svo nánari lýsing og myndir af herlegheitunum: http://mbl.is/mm/fasteignir/fasteign/index.html?eign=334606

Smá gáta

Hver var fyrsta konan til að komast á topp breska listans með eigið lag?

Í fyrsta sinn sem ég fékk útborguð alvöru laun fór ég og keypti þessa plötu og líka plötuna með Bonny Tyler. Svo voru þær spilaðar í druslur en einhverra hluta vegna lifir músíkin hennar Kötu en ekki Bonnýar.

Aftur til hversdagsins

Nú er komið að því að flestir taka niður jólaskrautið og slökkva jólaljósin. Börnin mín, 19 og 24 ára gömul byrja aftur í skólanum í fyrramálið og svei mér þá ef þau eru ekki bara spennt!

Hversdagurinn er framundan með sínu venjulega brauðstriti með töluvert dekkri undirtón en maður á að venjast. Ég varð því ekki hissa þegar ég sá í sjónvarpinu niðurstöður einhverrar könnunar sem sagði að stærsti hluti íslendinga telur að þetta splunkunýja ár verði þeim erfiðara fjárhagslega en það sem var að líða. Ég var eiginlega meira hissa á að það teldist frétt! 

Þó svo að það sé að mörgu leiti gott að komast aftur í hversdaginn, taka upp gamla rútínu og sofa og borða í sæmilega eðlilegu mynstri þá verður hann skrambans ári dimmur þegar enginn snjórinn er til að auka birtuna. Ég held því að það fái að lifa hjá mér einhver jólaljós svolítið áfram.

Friðsamleg hvað?

Hversu friðsamleg eru mótmælin ef þau eru búin að brjóta sér leið inn í hús? Hvernig er hægt að halda því t.d. fram að þeir sem fengu á sig piparúða inni í anddyri Hótel Borgar hafi verið "varnarlausir mótmælendur"?

Fólkið var búið að brjóta sér leið inn og hlýtti ekki margítrekuðum beiðnum lögreglunnar um að fara út. Þar að auki var búið að vara það við því að það yrði úðað ef það hlýddi ekki. Er fólkið svo hissa á því að lögreglan stóð við stóru orðin? Fólk sem kemur sér sjálft í svona aðstöðu á ekki að væla yfir afleiðingunum!

Gleðilegt ár og gangið varlega um gleðinnar dyr í kvöld og ævinlega!

Mótmælin áttu að vera friðsamleg

Gleðileg jól!

Það fór eitthvað lítið fyrir jólakortasendingum fyrir þessi jól. Þess í stað óska ég ykkur öllum þarna úti gleðilegra jóla og vona að allir hafi það sem allra best, hver á sinn hátt yfir hátíðarnar.

Ég er búin að vinna út í eitt undanfarið þannig að jólaundirbúningur var af frekar skornum skammti. Þó tókst að setja upp jólatré aðfararnótt aðfangadags og í gær var reddað því helsta sem til þurfti hér innanhúss. Maturinn lukkaðist frábærlega og aldrei þessu vant át ég ekki mér til óbóta. Góð tilbreyting!

Pakkarnir voru ákaflega vel heppnaðir. Krakkarnir (þessi 19 og 24 ára gömlu!) voru alsæl með það sem þau fengu og er gaman að sjá að þrátt fyrir að maður hafi ekki leyft sér sama íburð og stundum áður þá varð gleðin síst minni en oft áður. Reyndar hef ég sjaldan séð þau eins himinlifandi ánægð og Hrönn varð með nýja sæng og kodda og Árni Þór með bók og kuldahanska. Það sýnir manni og sannar einu sinni enn að það þarf ekki endilega að eyða hálfum ríkisfjárlögum til þess að gleðja sína nánustu. Kvöldið varð sem sagt ákaflega afslappað og notalegt.

Í morgun rauk Siggi á fætur og fór í eldhúsið og gekk frá því sem eftir var frá borðhaldinu í gær. Hann fær sko helling af prikum frá mér fyrir það. Nú ætla ég fram til hans og sitja með honum í afslöppum í stofunni í smá tíma. Rétt um hádegið röltum við okkur svo yfir til Hjartar bróður því hann tók að sér að vera með jólahangikjötið þetta árið. Vonandi að veður og færð sé ekki verri en svo að mamma og pabbi komist klakklaust til okkar. Á morgun verður svo hjá okkur hið árlega jólaboð fjölskyldunnar hans Sigga og þá verður líklega meira fjör því nú eru í fyrsta sinn 2 ný börn auk allra hinna sem hafa nú verið að fullorðnast undanfarið. Verður gaman að hafa litla kúta með aftur.

Enn og aftur, gleðileg jól öll, vinir mínir, og ég vona að þið eigið sem notalegust jól.

Ræður Ingibjörg Osló?

„Ingibjörg Sólrún Gísladóttir, Utanríkisráðherra, skrifaði í gær undir samkomulag um bann við notkun klasasprengja í Osló.“ Þessi setning var endurtekin hvað eftir annað í fréttum Rásar 2 núna í vikunni. Það varð til þess að upp spruttu nokkrar spurningar:

1.       Hver vildi nota klasasprengur í Osló?

2.       Ræður Ingibjörg í Osló?

3.       Ætti hún ekki frekar að banna sprengjurnar hérna heima?

4.       Á kannski bara að senda fréttamennina í íslenskukennslu í  grunnskóla?

Smá yfirlit

Mikið að gerast og lítill tími en enn minni nenna hjá minni.

Var með aðventu-piparkökuskreytinga-fjölskyldusamkomu á sunnudag. Kom fullt af fólki og skreytti piparkökur, spjallaði og fékk sér gott í gogginn. Gaman að það hittist svo vel á að Pétur tengdapabbi var í bænum og hann og Solla komu líka. Mjög vel heppnað finnst mér.

Búin að skreyta húsið að utan. Ferlega glæsilegt finnst mér  Er ekkert að skafa utan af því. Ég nenni hins vegar ekki út núna til að taka mynd af því og setja hingað inn. Hún kemur kannski einhvern næstu daga.

Ég er komin í vinnu. Eftir að hafa sparað við mig jólaundirbúninginn í nóvember af því ég hefði svo góðan tíma framundan er staðan orðin þannig að líkast til verður maður sofandi á jólunum ef einhver tími fæst til að versla í matinn!   En þetta er bara fínt!  Ég er semsagt komin á gamla staðinn í tímabundið verkefni sem verður brjáluð vinna í ca. 2 mánuði og síðan rólegt næstu 2 þar á eftir. Veit ekki hvað verður eftir það, kemur bara í ljós.

Ég verð s.s. ekki mikið heima hjá mér á næstunni og enn minna í bloggfæri. Þannig að það er ekkert víst að það verði mikið um bloggfærslur næstu daga eða vikur.

Jólaljósin

Hafið þið tekið eftir því hvað fólk er að kveikja fyrr á jólaljósunum en áður?

Mér finnst það að minnsta kosti og í þetta skiptið er ég alveg sátt við það. Það er kolniða myrkur úti, ekkert nema vesen og volæði í kringum okkur svo það er ekki nema gott að lýsa aðeins upp hjá okkur umhverfið og fegra það.

Til gamans læt ég fylgja með myndir af skreytingum sem ég dundaði mér við að útbúa í dag. Aðventukransinn þarf að vera tilbúinn fyrir næstu helgi svo ég skellti mér bara í að útbúa hann strax. Tilbreyting frá því að vera alltaf á sprettinum á síðustu stundu eða vera jafnvel að útbúa hann einhverjum dögum eftir byrjun aðventu!

Svo skelli ég líka inn mynd af Hrönn og Tristan svona til gamans.

Myndin var tekin 16. eða 17. nóvember s.l.